uyghurning uyqusi

ئۇيغۇرنىڭ ئۇيقۇسى

ئۇيغۇرنىڭ ئۇيقۇسى


ساداقەتجان ھاجى


بۇ ھەجۋى ئەمەستۇر. بۇ ئەمەس يۇمۇر.
بۇمۇ بىر قەسىدە. ئوقۇپ باق ئۇيغۇر.

ئۇيغۇرنىڭ ئۇيقۇسى ئەجەپمۇ تاتلىق؟
ئۇيغۇرۇم ئۇيقۇدىن ئىزدەيدۇ شاتلىق؟
ئەمگەكچان، مىھماندوست ئۇيغۇرۇم ئۈچۈن،
ئۇيقۇدۇر ــ ئەڭ گۈزەل شىرىن ھاياتلىق؟

ئۇيغۇرنىڭ ئۇيقۇسى ئەجەپمۇ راھەت؟
ئۇيغۇرۇم ئۇيقۇدىن ئىزدەيدۇ ئامەت؟
ياخشىدۇر ئۇيغۇرنىڭ ھەممە نىمىسى؟
ئۇيغۇرنىڭ چۈشىگە كىرمەس قىيامەت؟

ئۇيغۇرنىڭ ئۇيقۇسى كاتتا بىر سەنئەت؟
ئەللىيى ــ ناخشىدۇر. خورىكى ــ ناخشا؟
ئۇخلايدۇ ئويلىماي ئاقىۋىتىنى؟
ئاڭلىسا ئۇيغۇرنىڭ يۈرىكى ناخشا؟

ئۇيغۇرنىڭ ئۇيقۇسى ئەجەپمۇ ئۇزۇن؟
ئۇخلايدۇ ناخشىنى ئاڭلىغانسىرى؟
ئۇيغۇردا بار شۇنداق بىر ئادەت - يوسۇن؟
ئۇخلايدۇ ئۇيغۇرنى داڭلىغانسىرى؟

ئۇيغۇرنىڭ ئۇيقۇسى ئەجەپمۇ داڭلىق؟
ئۇيغۇرنىڭ دۇنيادا تەڭدىشى يوقتۇر؟
ئۇيغۇرۇم ئەزەلدىن ئۇخلايدۇ ئاڭلىق؟
ئۇيقۇسىز قالغۇدەك تەشۋىشى يوقتۇر؟

ئاسماندا ئۇچۇش ھەم دېڭىزدا ئۈزۈش...
ئۇيغۇرنىڭ ئىشى ئەمەس؟ ئويغاقنىڭ ئىشى؟
ئىجاد دەرياسىدىن جاۋاھىر سۈزۈش...
ئۇيغۇرنىڭ ئىشى ئەمەس؟ ئويغاقنىڭ ئىشى؟

كارى يوق ئۇيغۇرنىڭ ئاي، يۇلتۇز بىلەن؟
كارى يوق ئۇيغۇرنىڭ تىرىلسە جەسەت؟
كارى يوق ئۇيغۇرنىڭ ئويغاقلار بىلەن؟
ئۇيغۇرۇم ھىچكىمگە قىلمايدۇ ھەسەت؟

ئۇخلايدۇ ئۇيغۇرۇم پولو، كاۋاپ يەپ؟
ئۇخلايدۇ ئۇيغۇرۇم مۇقامنى ئاڭلاپ؟
ئۇخلايدۇ ئۇيغۇرۇم «ئۇخلاش ــ ساۋاب» دەپ؟
ئۇخلايدۇ ئۇيغۇرۇم ئۆزىنى داڭلاپ؟

ئۇيغۇرنىڭ ئۇيقۇسى ــ ئۇلۇغ ئۇيقۇدۇر؟
ئويغانما؟ ئويلانما؟ ئۇخلا ئۇيغۇرۇم؟
ئۆزگىلەر ئويغانسا ئۆزىنىڭ ئىشى؟
سەن ھەرگىز ئويغانما؟ ئۇخلا ئۇيغۇرۇم؟

ئوڭۇڭدا يوقىنى ئۇيقۇڭ بېرىدۇ؟
قالىسەن چۈشۈڭدە بولۇپ قاناتلىق؟
ئۇيغۇرۇم ئەيلىمە ئىشقىڭنى بىدار؟
ئۇيغۇرۇم! سەن ئۈچۈن ئۇيقۇ ــ ھاياتلىق؟؟؟

(2004-يىل 10-ئاي. قەشقەر)
ـــــــــــــــــــــــــــــــــ

بۇ شېئىرنى باشقا توربەتلەرگە كۆچۈرۈرۈپ يوللاشقا بولمايدۇ. ئەگەر كۆچۈرۈپ يوللىسڭىز بارلىق ئاقىۋەتكە ئۆزىڭىز مەسئۇل بولىسىز.


Uyghurning uyqusi


Sadaqetjan haji


Bu hejwi emestur. Bu emes yumur.
Bumu bir qeside. Oqup baq uyghur.

Uyghurning uyqusi ejepmu tatliq?
Uyghurum uyqudin izdeydu shatliq?
Emgekchan, mihmandost uyghurum üchün,
Uyqudur -- eng güzel shirin hayatliq?

Uyghurning uyqusi ejepmu rahet?
Uyghurum uyqudin izdeydu amet?
Yaxshidur uyghurning hemme nimisi?
Uyghurning chüshige kirmes qiyamet?

Uyghurning uyqusi katta bir sen'et?
Elliyi -- naxshidur. Xoriki -- naxsha?
Uxlaydu oylimay aqiwitini?
Anglisa uyghurning yüriki naxsha?

Uyghurning uyqusi ejepmu uzun?
Uxlaydu naxshini anglighansiri?
Uyghurda bar shundaq bir adet - yosun?
Uxlaydu uyghurni danglighansiri?

Uyghurning uyqusi ejepmu dangliq?
Uyghurning dunyada tengdishi yoqtur?
Uyghurum ezeldin uxlaydu angliq?
Uyqusiz qalghudek teshwishi yoqtur?

Asmanda uchush hem déngizda üzüsh...
Uyghurning ishi emes? Oyghaqning ishi?
Ijad deryasidin jawahir süzüsh...
Uyghurning ishi emes? Oyghaqning ishi?

Kari yoq uyghurning ay, yultuz bilen?
Kari yoq uyghurning tirilse jeset?
Kari yoq uyghurning oyghaqlar bilen?
Uyghurum hichkimge qilmaydu heset?

Uxlaydu uyghurum polo, kawap yep?
Uxlaydu uyghurum muqamni anglap?
Uxlaydu uyghurum «uxlash -- sawab» dep?
Uxlaydu uyghurum özini danglap?

Uyghurning uyqusi -- ulugh uyqudur?
Oyghanma? Oylanma? Uxla uyghurum?
Özgiler oyghansa özining ishi?
Sen hergiz oyghanma? Uxla uyghurum?

Ongungda yoqini uyqung béridu?
Qalisen chüshüngde bolup qanatliq?
Uyghurum eylime ishqingni bidar?
Uyghurum! sen üchün uyqu -- hayatliq???

(2004-Yil 10-ay. Qeshqer)
&&&&&&&&&&&&&&&&&

Bu shé'irni bashqa torbetlerge köchürürüp yollashqa bolmaydu. Eger köchürüp yollisngiz barliq aqiwetke özingiz mes'ul bolisiz.