Ghojimuhemmed muhemmed ghezelliri

Ghezeller


Ghojimuhemmed muhemmed


(1)

Méning yalghuzluqum yalghuz tikenni xaru-zar etti.
Léwim meyxanige kirdi, sharab yoq, nale-zar etti.

Qénim meshrebte ulghaydi, nawa qildi qelenderlik,
Dilimda yeru-asman hem köyüshni ixtiyar etti.

Kulahim kök irur, jendem payansiz chöl-bayawandur,
Derdu-ghem, nale-ebghanlar méni pinhan mazar etti.

Itmu hem turmaydighan hergiz méning bu weyrane könglümni
Judaliq hesriti qaynaq qiyametlik bazar etti.

Yüzümdur qiblige, könglüm nigargha bu ibadette,
Wujudum yükünüp miskin, ishqni perwerdigar etti.

Muqamlar towlidi zar-zar méning her bir tüküm hetta,
Quchaqlap göshlirimni ah, songikim yariyar etti.

Sésidi jan-jénim tende, alghili naz ile ah-ah
Ejebmu kelmidi yarim, ejelge intizar etti.

(2)

Közüm yar yolida qaldi, méni seylane etmenglar,
Yüzüm yar ayaghida tupraq, güli-güldane etmenglar.

Yatar desht, chöl-bayawanlar ishq aptabida changqap,
Yéshim ah, warqirap aqsun, méni piyale etmenglar.

Wisal arghamchisin birdem üzey qelbim qanatlansun,
Chüshümde bir körey yarni, méni aware etmenglar.

Jahan'gha bir kélipturmen, özümge liq tolupturmen,
Azari-ghelwe majragha méni nishane etmenglar.

Ölükler ötti aldimdin yaqasi chaku-chak mejnun,
Jinaza keynidin mangghan méni piyade etmenglar.

Ichimde bir kishi bardur, qetil qilmaqqa teyyardur,
Uningki bir qulidurmen, méni merdane etmenglar.

Ilahim ey ghoji deptu, sanga köymek ishi keptu.
Méni jennettiki dozax ara sersane etmenglar.

(3)

Tirikmen, shu seweb kürming béshimgha derd - elem keldi,
Elemler xulqini küylesh üchün oynaq qelem keldi.

Qelem ayaghidin ündi boranliq desht-bayawanlar,
Bayawan ichre changqap mey sorap dilber-senem keldi.

Senemning qolida dutar, nawa qildi tümen sewda,
Ki sewda, ishqidin ghewgha, riyazet dembedem keldi.

Ishqning meqsidi janni bérish dep wesli didargha
Bolup mejnuni diwane yaqa yirtip ejem keldi.

«muqamlarning atasini hüseyniyu ejem derler»
Uninggha egiship barche nawaler möhterem keldi.

Yüzümge chüshti nur, beytulmuqeddestur bu'an könglüm,
Tawabqa derdu-külpet hem musheqqet barche jem keldi.

Ghoji jan aywanidin ketkin, köyüshni ixtiyar etkin,
Ishqqa bas ayagh emdi, mubarek bir qedem keldi.

(4)

Yétetti weslige janim, ölümni öltürüp ölsem,
Ölümning baghrida bir ret jénimni küldürüp ölsem.

Manga bu nezmixanliqtin ne shöhret, ne ada bolghay?
Sirimni sözge jem eylep lehetke müktürüp ölsem.

Köyüp men kéche hem kündüz, ishqtin qaytmidim hergiz,
Yétetti otqa ot andin bu otni köydürüp ölsem.

Közümdin qurumas yashim, pighanliq ichi hem tashim,
Bolatti dur-göher tashim, bu yashqa chöktürüp ölsem.

Qetle'i naz ile ah-ah baqar nezmem quridin yar,
Tapatti weslini könglüm uni men bir körüp ölsem.

Chéchini qamcha qip kelse muhebbet harwisi birle
Étimni men anga qatsam, seperde men yürüp ölsem

Nigar quchaghidin özge tipilghaymu manga qebre,
Bu ishq ichre yaranlar yene ming özgürüp ölsem

*********************************************