Rozi sayit shé'irliri

Rozi sayit shé'irliridin jewherler


Ana tilim - zer tilim

Til alaqe qorali, til qelbning eyniki,
Til ademge ademni baghlap turghan zer rishte.
Til xezine, til hékmet, til muhebbet köwrüki,
Til haywanni insan'gha aylandurdi perwishte.

Til nadan'gha pem bérip, til zuwan'gha nep bérip,
Hayatliqning abadi méhir tapti söyükte.
Shunga herbir qowumchün meyli kichik chong bolsun,
Ana tili-öz tili shunche olugh-büyükte.

Uyghur tili uwaq til, uyghur tili umaq til,
Sekkiz milyon bulbulning ashu tilda nawasi.
Uyghur tili kichik til emma tatliq-chüchük til,
Men shu tilning sheydasi,mirasxori-heghdasi

Mushu tilda newa'iy keygen nawa tajini,
Shah meshrebni mushu til érishtürgen sherepke.
Yüsüpke «xas hajip»liq ata qilghan mushu til,
Mehmud ata shu tilda ders ötkenken erepke.

Men shu ana til bilen baghashlidim baharni,
Gül-chéchekke pürken'gen chimenlerni arilap.
Men külimen, qewmimni küldürimen qelemde
Tilgha ün'gen haram shax-köteklerni parchilap!


Uyghurnisa

Ey güzel uyghur qizi- uyghurnisa,
Ey latapet yaltuzi uyghurnisa.
Ay yüzi, cholpan közi uyghurnisa,
Misli güzel qirmizi uyghurnisa,
Neqla uyghurning özi uyghurnisa!

Ismigha jismi yarashqan bashqiche,
Bir süret nuqsani yoq, kör bashqiche,
Maxtimaqchidim süpettin ashquche,
Azdi ilham teswiri yandashqiche,
Rast bu, sen uzning uzi uyghurnisa.

Bashtiki doppang goya taj-jilwidar,
Kakulung tay qiyghitip chapqan qatar,
Osma qoyghan egme qashing jan utar,
Kirpiking her qilsa «lip» ming tang atar,
Pah! hösning endizi uyghurnisa.

Üsti-bashingda xotenning etlisi,
Mangliying keng , qangshiring xenjer bisi,
Lew jinestengde qizil ghunche tüsi,
Bir körüp mest, yoq yigitning es-hoshi,
Qelbi pak, kök yultuzi uyghurnisa.

Pul-ézitqu tengge qilsa «jildiring»
Binezersen, esla chüshmes köz qiring,
Pak yashashta , shermi -hayada siring,
Zahiringdin hessilep uz dil yéring,
Yat sanga jin perdizi uyghurnisa.

Sen üchün ippet-nomus jandin eziz,
Sen üchün söygü- wapa baldin leziz,
Sen üchün ehdu-qesem yüksek-égiz,
Ishqi laplargha séning qehring bégiz,
Meyli axsham , kündüzi uyghurnisa.

Yingne tutsang keshtige ujmaq qonar,
Ger köchet tikseng boluq alma-anar,
Ger térim qilsang qonaq-bughday monar...
Sen bilen besleshse ashpezmu chanar,
Ah kamalet «tem-tuzi» uyghurnisa.

Ehli yurtqa ish-izing bir endize,
Qoshnilargha dil'azaring yoq bize,
Öy tutushqa bek chéwersen, pakize,
Héch emessen béqowul, bosh-ajize,
Bu baha- el teqrizi uyghurnisa.

Zahiring, yaq batiningni bir körüp,
Yeydu armaningni köpler telmürüp,
Emma meylingni birige söydürüp,
Bolghiningni sen bilemsen, köydürüp,
De-talashning merkizi uyghurnisa.

Razi sendin nan bérip baqqan peder,
Hem anangmu pexirlen'gey shu qeder,
Shu yolungdamang dawamliq- mang beder,
Este tut: egiz emes, sherbet küter,
Teshna lewning ussuzi uyghurnisa.

Pushti insan zimmide alem yüki,
Kulli alemdin éghir «adem yüki»
Qiz yüki-merdlik yüki, hatem yüki,
Rahitidin jiq japasi, ghem yüki,
Ghem, ghorurning yiltizi uyghurnisa.

Biz hayatning körki, sen gültajisi,
Biz chimende lale, sen tagh archisi,
Biz nawakesh, sen büyüklük jarchisi,
Qiz-ana, qiz-ete, barche-barchisi...
Neq shu sen- uyghur qizi- uyghurnisa!

******************************