Heqiqiy Yiltiz

ey qéri derex, qurighan shaxliringni chatiwet.sarghayghan yopurmaqliringni töküwet. nadanliq - séning shéxing emes. rezillik – séning yopurmiqing emes. chüshkünlük – séning miweng emes.


heqiqiy yiltiz

(nesir)

sadaqetjan haji

ey qéri derex, qurighan shaxliringni chatiwet.sarghayghan yopurmaqliringni töküwet. nadanliq - séning shéxing emes. rezillik – séning yopurmiqing emes. chüshkünlük – séning miweng emes. eger sende qaytidin köklesh arzusi bolsa, ishinimenki yüriking yene kökleydu.chirayliq chéchekliring yene échilidu. miwiliring yene jilwe qilalaydu.chünki séning chungqur yiltizing bar.
sen heqiqeten büyük bir mewjudatsen. chünki séning tomurungda éqiwatqan qan ana ziminning yürikidin kelgendur. séning yürikingdin kölewatqan arzu-arman shaxliri bolsa bipayan asmangha intilgendur we uning baghrida perwaz qiliwatqan erkin qushlargha hewes qilghandur.
sen heqiqeten büyük bir mewjudatsen. chünki sen esirlerdin biri bu chöl-bayawanda bir möjizidek yashap kelding. talay-talay boranlar sansiz qitim qeddingni égip, shaxliringni sundurghan chaghdimu yiltizingni qurutalmidi. sen bu ziminda turup muqeddes quyashning nurghun qitim zulmet qepizidin uchup chiqqanliqigha shahid boldung. séning ghazang dozixigha chüshken chaghliringmu bolghan idi. lékin chungqur yiltizing haman pinhan yashnighan. ümidwar yüriking haman chéchekleshke teyyar turghan... xuddi bügünkidek hayat-mamatliq tallash séning béshinggha nurghun qitim kelgen...
ey qéri derex, bu zimin, bu asmanning tarixi séning heqiqiy yiltizingdur. bundaq yiltizning qurup kétishi esla mümkin emes!
lékin shunisi éniqki,eger sen chungqur yiltizinggha ishinip haram shaxliringni putap turmisang, bu bipayan zimin we cheksiz asmandin ziyade ümid kütseng, chuqum qurup qaxshal bolisen. andin peqet yashash istikidilaboliwatqanlarning otini ulghaytidighan otun, qazinini qaynitidighan ot bolisen...

(1997 - yil 2 - ay. qeshqer)
(«turpan» jhornili 1999 - yilliq 1 - san)


ھەقىقىي يىلتىز

(نەسىر)

ساداقەتجان ھاجى

ئەي قېرى دەرەخ، قۇرىغان شاخلىرىڭنى چاتىۋەت.سارغايغان يوپۇرماقلىرىڭنى تۆكۈۋەت. نادانلىق - سېنىڭ شېخىڭ ئەمەس. رەزىللىك – سېنىڭ يوپۇرمىقىڭ ئەمەس. چۈشكۈنلۈك – سېنىڭ مىۋەڭ ئەمەس. ئەگەر سەندە قايتىدىن كۆكلەش ئارزۇسى بولسا، ئىشىنىمەنكى يۈرىكىڭ يەنە كۆكلەيدۇ.چىرايلىق چېچەكلىرىڭ يەنە ئېچىلىدۇ. مىۋىلىرىڭ يەنە جىلۋە قىلالايدۇ.چۈنكى سېنىڭ چۇڭقۇر يىلتىزىڭ بار.
سەن ھەقىقەتەن بۈيۈك بىر مەۋجۇداتسەن. چۈنكى سېنىڭ تومۇرۇڭدا ئېقىۋاتقان قان ئانا زىمىننىڭ يۈرىكىدىن كەلگەندۇر. سېنىڭ يۈرىكىڭدىن كۆلەۋاتقان ئارزۇ-ئارمان شاخلىرى بولسا بىپايان ئاسمانغا ئىنتىلگەندۇر ۋە ئۇنىڭ باغرىدا پەرۋاز قىلىۋاتقان ئەركىن قۇشلارغا ھەۋەس قىلغاندۇر.
سەن ھەقىقەتەن بۈيۈك بىر مەۋجۇداتسەن. چۈنكى سەن ئەسىرلەردىن بىرى بۇ چۆل-باياۋاندا بىر مۆجىزىدەك ياشاپ كەلدىڭ. تالاي-تالاي بورانلار سانسىز قىتىم قەددىڭنى ئېگىپ، شاخلىرىڭنى سۇندۇرغان چاغدىمۇ يىلتىزىڭنى قۇرۇتالمىدى. سەن بۇ زىمىندا تۇرۇپ مۇقەددەس قۇياشنىڭ نۇرغۇن قىتىم زۇلمەت قەپىزىدىن ئۇچۇپ چىققانلىقىغا شاھىد بولدۇڭ. سېنىڭ غازاڭ دوزىخىغا چۈشكەن چاغلىرىڭمۇ بولغان ئىدى. لېكىن چۇڭقۇر يىلتىزىڭ ھامان پىنھان ياشنىغان. ئۈمىدۋار يۈرىكىڭ ھامان چېچەكلەشكە تەييار تۇرغان... خۇددى بۈگۈنكىدەك ھايات-ماماتلىق تاللاش سېنىڭ بېشىڭغا نۇرغۇن قىتىم كەلگەن...
ئەي قېرى دەرەخ، بۇ زىمىن، بۇ ئاسماننىڭ تارىخى سېنىڭ ھەقىقىي يىلتىزىڭدۇر. بۇنداق يىلتىزنىڭ قۇرۇپ كېتىشى ئەسلا مۈمكىن ئەمەس!
لېكىن شۇنىسى ئېنىقكى،ئەگەر سەن چۇڭقۇر يىلتىزىڭغا ئىشىنىپ ھارام شاخلىرىڭنى پۇتاپ تۇرمىساڭ، بۇ بىپايان زىمىن ۋە چەكسىز ئاسماندىن زىيادە ئۈمىد كۈتسەڭ، چۇقۇم قۇرۇپ قاخشال بولىسەن. ئاندىن پەقەت ياشاش ئىستىكىدىلابولىۋاتقانلارنىڭ ئوتىنى ئۇلغايتىدىغان ئوتۇن، قازىنىنى قاينىتىدىغان ئوت بولىسەن...

(1997 - يىل 2 - ئاي. قەشقەر)
(« تۇرپان» ژورنىلى 1999 - يىللىق 1 - سان)