Uyghur tilim

Ey méning ana tilim – uyghur tilim
Sensiz men uyghur bolup yürelmeymen.
Sen manga ata - anam amaniti.
Yoqatsam séni jawap bérelmeymen.



Uyghur tilim
-------------------------


Sadaqetjan haji
-------------------------


Dunyagha échilghanda méning közüm,
Éytilghan séning bilen tunji sözüm.
Ey méning ana tilim – uyghur tilim
Sen bilen yoruq bolup keldi yüzüm.

Sen bilen qildim bayan pikrimni men,
Singdürüp pikrimge dil mihrimni men.
Qanatqa ige qildim sunmaydighan,
Sen bilen tepekkurum – zéhnimni men.

Sen bilen sirlirimni saqlap keldim.
Sen bilen heqiqetni yaqlap keldim.
Sen bilen ijat qilip az bolsimu,
Xelqimning ümidini aqlap keldim.

Sendidur ejdadlarning yürek sözi.
Sendidur bextimizning bir yultuzi.
Bextimni tiler idi kichikimde,
Sen bilen elley éytip anam özi.

Sensiz men éytalmaymen naxshilarni.
Sensiz xush qilalmaymen yaxshilarni.
Xelqimge chüshendürüp adaletni,
Sensiz pash ételmeymen wehshilerni.

Sensiz men uyghur bolup yürelmeymen.
Jennetke uyghur bolup kirelmeymen.
Sen manga ata - anam amaniti.
Yoqatsam séni jawap bérelmeymen.

★★★★★★★★★★
(1992-Yil 3-ayning 8-küni. Qeshqer)
(«Shinjang maaripi» jhornili 1997-yilliq 10-san)
★★★★★★★★★★



ئۇيغۇر تىلىم
-------------------------


ساداقەتجان ھاجى
-------------------------


دۇنياغا ئېچىلغاندا مېنىڭ كۆزۈم،
ئېيتىلغان سېنىڭ بىلەن تۇنجى سۆزۈم.
ئەي مېنىڭ ئانا تىلىم – ئۇيغۇر تىلىم
سەن بىلەن يورۇق بولۇپ كەلدى يۈزۈم.

سەن بىلەن قىلدىم بايان پىكرىمنى مەن،
سىڭدۈرۈپ پىكرىمگە دىل مىھرىمنى مەن.
قاناتقا ئىگە قىلدىم سۇنمايدىغان،
سەن بىلەن تەپەككۇرۇم – زېھنىمنى مەن.

سەن بىلەن سىرلىرىمنى ساقلاپ كەلدىم.
سەن بىلەن ھەقىقەتنى ياقلاپ كەلدىم.
سەن بىلەن ئىجات قىلىپ ئاز بولسىمۇ،
خەلقىمنىڭ ئۈمىدىنى ئاقلاپ كەلدىم.

سەندىدۇر ئەجدادلارنىڭ يۈرەك سۆزى.
سەندىدۇر بەختىمىزنىڭ بىر يۇلتۇزى.
بەختىمنى تىلەر ئىدى كىچىكىمدە،
سەن بىلەن ئەللەي ئېيتىپ ئانام ئۆزى.

سەنسىز مەن ئېيتالمايمەن ناخشىلارنى.
سەنسىز خۇش قىلالمايمەن ياخشىلارنى.
خەلقىمگە چۈشەندۈرۈپ ئادالەتنى،
سەنسىز پاش ئېتەلمەيمەن ۋەھشىلەرنى.

سەنسىز مەن ئۇيغۇر بولۇپ يۈرەلمەيمەن.
جەننەتكە ئۇيغۇر بولۇپ كىرەلمەيمەن.
سەن ماڭا ئاتا - ئانام ئامانىتى.
يوقاتسام سېنى جاۋاب بېرەلمەيمەن.

★★★★★★★★★★
(1992-يىل 3-ئاينىڭ 8-كۈنى. قەشقەر)
(«شىنجاڭ مائارىپى» ژۇرنىلى 1997-يىللىق 10-سان)
★★★★★★★★★★